ᐅᖃᐅᓯᑦᓴᖏᑦ ᒥᓂᔅᑕᒦᖔᖅᑐᑦ

ᐃᓕᓐᓂᐊᕐᓂᓕᕆᓂᕐᒧᑦ ᐊᑐᖃᑦᑕᖅᑕᕗᑦ ᐱᐅᓂᖅᐹᖑᔪᑦ ᐱᓕᕆᔾᔪᑎᒋᓪᓗᒍ ᐱᓯᒪᔭᕗᑦ ᐃᓅᖃᑎᒌᓐᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᒪᓕᒐᕗᓪᓗ ᐃᑲᔪᕈᓐᓇᕐᒥᔪᑦ ᐅᕙᑦᑎᓐᓂᑦ ᐅᓪᓗᒥᐅᔪᖅ ᐃᓕᓐᓂᐊᕐᓂᕐᒧᑦ ᐊᑦᓱᕉᑕᐅᔪᓂᑦ.   

2017-ᒥ, ᑕᓪᓕᒪᖓᓐᓂ ᓄᓇᕗᒻᒥ ᒪᓕᒐᓕᐅᕐᕕᖕᒥ ᓇᓗᓇᐃᖅᓯᓚᐅᖅᐳᑦ ᒐᕙᒪᖓᓄᑦ ᓯᕗᓪᓕᐅᔾᔭᐅᔪᒪᔪᓂᑦ ᐊᒻᒪ ᑐᙵᕕᖏᓐᓂᒃ ᐊᕐᕌᒍᓄᑦ ᓯᑕᒪᓄᑦ ᐊᑐᕐᓂᐊᖅᑐᓄᑦ. ᑐᕌᖅᑕᕗᒻᒥᑦ, ᒐᕙᒪᒋᔭᕗᑦ ᐊᖏᖅᓯᒪᓪᓚᕆᒃᐳᑦ ᐃᓕᓐᓂᐊᕈᑎᑦᑎᐊᕙᖕᓂᒃ ᓴᖅᑭᑎᑦᑎᖃᑦᑕᕈᒪᓪᓗᑎᒃ, ᐱᐅᓯᒋᐊᖅᑎᓪᓗᒋᑦ ᐃᓕᓐᓂᐊᖅᑏᑦ ᓴᖅᑭᑎᑕᖏᑦ ᐃᓄᒃᑐᓪᓗ ᓴᙱᑎᒋᐊᕐᓗᒍ. ᑖᒃᑯᐊ ᐊᖏᖅᓯᒪᓂᐅᔪᑦ ᐋᖅᑭᒋᐊᕆᓂᕐᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖓᓐᓂᑦ ᐃᓄᐃᓪᓗ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖓᓐᓂᑦ ᓯᕗᓪᓕᐅᑎᑕᐅᕗᑦᕗᑦ ᒐᕙᒪᒃᑯᓐᓄᑦ. 

ᓯᕗᓪᓕᐅᑎᑕᐅᔭᐅᔪᒪᔪᒥᑦ ᓯᕗᒻᒧᐊᒃᑎᑦᑎᔪᒪᕗᒍᑦ. ᐃᓕᓐᓂᐊᕐᓂᓕᕆᓂᖅ ᑐᕌᖅᐸᓪᓕᐊᔭᕗᑦ − ᐃᓕᓐᓂᐊᕐᓂᓕᕆᓂᕐᒧᑦ ᑐᕌᒐᕆᔭᕗᑦ, ᑐᑦᓯᕋᐅᑎᐅᕗᖅ ᑐᕌᒐᖃᖅᓱᓂ ᐃᓚᐅᑎᑦᓯᓪᓚᕆᒍᒪᓪᓗᑎᒃ ᐃᓕᓐᓂᐊᕐᓂᓕᕆᔨᒃᑯᓐᓂ ᑲᑐᔾᔨᖃᑎᒌᓂᑦ, ᓂᕈᐊᖅᑕᐅᓯᒪᔪᑦ ᐃᖅᑲᓇᐃᔭᖅᑎᓂᑦ, ᐊᒻᒪ ᓄᓇᕗᒻᒥᐅᓂᒃ ᑲᑐᔾᔭᐅᒐᔪᒃᑐᓂᑦ ᐋᖅᑭᒋᐊᕈᑎᒃᓴᓂᒃ ᐃᓕᓐᓂᐊᖅᑐᓕᕆᔾᔪᑎᒥᒃ ᐱᕙᓪᓕᐊᑎᑦᑎᓂᕐᒧᑦ ᐃᓕᓐᓂᐊᕐᑐᓕᕆᔾᔪᑎᑦᑎᓐᓄᑦ ᐊᑐᖃᑦᑕᖅᑕᑎᓐᓄᑦ.  

ᑕᕝᕙᓂ ᐅᑭᐊᑦᓵᖅ ᐊᐅᓪᓚᖃᑦᑕᕐᓂᐊᖅᑐᒍᑦ ᓄᓇᕘᓕᒫᒧᑦ, ᑭᒃᑯᑐᐃᓐᓇᕐᓂᑦ ᐅᖃᖃᑎᖃᖃᑦᑕᕐᓂᕐᒧᑦ ᓇᓗᓇᐃᖅᓯᓂᕐᒥᑦ ᓂᐱᒋᔭᐅᔪᓕᒫᑦ ᐃᓱᒪᒋᔭᐅᔪᓕᒫᓪᓗ ᑐᓴᖅᑕᐅᖁᑦᓱᒋᑦ. ᐃᓕᓐᓂᑦ ᑐᓴᕈᒪᔪᒍᑦ ᖃᓄᖅ ᐱᕈᖅᑎᑦᓯᒍᓐᓇᕐᓂᕐᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ ᑐᙵᕕᖃᕐᓂᕐᒥᑦ ᐃᓄᐃᑦ ᐃᓕᖅᑯᓯᖓᓂᑦ, ᖃᐅᔨᒪᓂᖏᓐᓂᑦ ᐱᓕᕆᔾᔪᓯᖏᓐᓂᓪᓗ.   

ᐱᓕᕆᐊᑦᑎᓐᓂᑦ ᑲᔪᓯᑎᑦᓯᓯᒪᓕᖅᑐᒍᑦ ᑕᐃᒪᙵᓂᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖓ ᖄᖏᖅᑎᑕᐅᓚᐅᖅᓯᒪᒻᒪᓂᑦ 2008-ᒥ. ᐅᑉᐱᕈᓱᑦᑐᖓ ᐅᖃᖃᑎᒌᓐᓂᑎᒍᑦ ᓴᓇᕙᓪᓕᐊᓂᐊᖅᑕᕗᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᖅ ᓇᓗᓇᐃᖅᓯᓂᕐᒥᑦ ᐱᐅᔪᒥᑦ ᒪᕐᕉᓐᓂᑦ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕐᑎᑦᓯᓂᕐᒥᑦ ᓄᓇᕗᒻᒥ ᑲᔪᓯᓂᖃᑦᓯᐊᕐᓂᖏᓐᓂᓪᓗ ᐃᓕᓐᓂᐊᕐᑎᓕᒫᑦ.  

ᑕᐃᕕᑎ ᔪᐊᓇᓯ
Hon. David Joanasie

ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ
Minister of Education
Minista Ilinniaqtuliriiyitkunni
Ministre de l’Éducation