Ihuaqtumik Upautiniq

Havaangit uvalu Munagiyakhait hapkua Iliniaqtuliqinikkut Kaatimayiit uvalu Iliniaqtuliqiyiit

Iliniaqtuliqiyiit Katimayiit (DEAs) pidjutiqaqtut ihuaqtumik havauhiqmik ilihaqnikkut auladjutini. Niguaqtauhimayut akiitumik katimayiit kitut tunihiyut nakuunikkut kivgaqtuutinik haffumunga ilihaqnikkut ilihaidjutinun nunamingni aktilaanginun uvalu tunihiblutik maligahanik ilihaqviknun qanuq pidjutiqaqtukhat nunallaat pitquhiinun uvalu hivunikhaliugutainun.

Ataani uvani 2008 Iliniaqtuliqiyit Maligaq, DEAtkut piqaqtut amigaitunik havaktakhait tapkua piyakhaqaqtut amigaitunik ikaangninik uvalu ikayuutinik. Una ilitagiyauyuq DEAtkunin, Katimayiitlu Nunavunmi DEAtkunin, Havagvianit Qauhiyaqtiryuap Kanatami uvalu Taiyauhimayut Katimayiit Ihivgiugiangani una Iliniaqtuliqiyiit Maligaa. Tukhiqtugut hapkuninga ihuaqhaqtauyukhanik ikayuutikhat uqautigiyaangani ilait auladjutikkut akhuugutauyut hapkununga DEAtkunun.

Tukhidjutivut:

Ilinniaqtuliqiyitkut:

  • Havaklutik ilauqatigiiknikkut ilihaqnikkut ihuiguhuutit.
  • Havaklutik atanguyat uvalu tugliit atanguyanik tikuaqhiniq tikuaffaaqnikkut katimayiit.
  • Havaklutik pingahunik ilihaqnikkut tatqiqhiutinik katimaqatigiblugit Iliniaqtuliqiyiit Katimayiit (DEAC), alakiinik aulagutit uvalu iniqtigutit ubluit, hapkununga nunamingni Iliniaqtuliqiyiit Katimayiit (DEA) piyakhainik.
  • Tunihilutik Nukaqhinut Nutaqqanut Iliharnirmut (ECE) ilihaidjutinik humi DEAtkut piumangitpata.

DEAtkut:

  • Apiqhilutik taiyauhimayunik kivgaqtuutinik uvalu ihivgiugutinik, ilauyut ilauqatigiiknikkut Ilihaqniqmun ihuiguhuutinik mikhaanun angayuqaat uvalu iningnigit ilihaqtut.
  • Ihumaliugutigilugit aalanik hulidjutikhanik ilihaqnikkut tatqiqhiutainun, pihimalugit nunaitigut hivuliuyukhat, pidjutigilugit ayuittiaqnikkut piallianikkut ublut.
  • DEAtkut tunihilutik hivulikhaliuqnikkut atugahanik pidjutinik ilauyunik Ilihaqviit Ilihaidjutainik uvalu Munamingni Ilihaidjutinik uvalu haffumungaungitup Ilihaqnikkut Ilihaidjutainun.
  • DEAtkut piqaqlutik hivuliulutik piyakhanik tunihinikkut ECEt ilihaidjutainun. DEAtkut tapkua piumayut tunihilutik ECEtkut ilihaidjutainik tapkua tunihiyaangini ilihaidjutinik inmikkut uvalu atungilugit pingahuuyuni ECEtkut tunihiyunin.

Atanguyat:

  • Atuliqtilugit Ilauqatigiiknikkut Ilihaqniq uvalu kangiqhipkaqlugit DEAtkut atuliqniitigut.
  • Tunilugit DEAtkut ihuaqniitigut uniudjutinik tunihinikkut haffuminga Ilihaqnikkut Ilihaidjutinun ikayuutikhat DEAtkunun uqautinikkut nunamingnik hivliuyukhanik.

Ikayuutikhaluat:

  • Mikhiyuumiqlugu auladjutikkut ayuqhautit hapkununga DEAtkunun.
  • Pipkaqlugit DEAtkut tugaaqhimalutik nunamingnun, nunallaanun pihimayunik ilihaidjutinik.
  • Angikliyuumiqlugu DEAtkut piyaaqnigit uqautigilugit nunallaatik.

Una titiraq aulangituq ilituqhaiyangat havaktauyukhat munagiyauyukhat taima tapkuninga aulahimayut talvani Commission scolaire-mi francophone du Nunavut (CSFN).